PABLO ANTÓN MARÍN ESTRADA
Dientro d’unos díes nel Campus del Milán va celebrase un seminariu tituláu ‘Llingua, clase y sociedá’. Especialistes asturianos y de diverses universidaes del Estáu van xuntase a debatir alrodiu d’una d’eses cuentes pendientes que l’ideariu progresista sigue teniendo colos oriellaos de la Historia, xente invisible nel relatu oficial del camín al través del tiempu de les comunidaes sociales.
El pasáu sieglu XX remaneció de les sombres y el silenciu a les muyeres (nada menos que la mitá del xéneru humanu), a les mal llamaes minoríes discriminaes por motivu de color de piel, orixen, opciones sexuales. Millones de seres humanos que permanecieran dende la nueche de los tiempos reducíos a la invisibilidá, a la non esistencia oficial o a la esistencia ensin nengún tipu de derechos. La so remanecencia fue’l gran progresu d’un sieglu bayurosu n’atrocidaes y sangrientes llocures colectives.
Anguaño nenguna conciencia progresista nin conservadora sería a poner en tela de xuiciu la universalización de los derechos humanos a tolos seres d’esa condición, sociedaes, colectivos, pueblos. De vez en cuando hai inda quien tenta facelo dende’l fanatismu relixosu o moral, mesmo instituciones tan aparentemente respetables como partíos políticos, iglesias, medios de comunicación dan blincos hacia atrás, hacia la nueche. Los amigos de la foguera tán ende y siempre van tar acusbiando, anque’l mundu xire y les mentalidaes llimpien de prexuicios.
La negación de los derechos por razón de llingua sigue siendo una realidá n’estaos aparentemente modélicos en llibertaes democrátiques como l’español. Equí, ensin dir más llonxe, en casa, la consideración que merecen la llingua asturiana y los sos falantes a la mayoría de los políticos con responsabilidá y a bien de creadores d’opinión social, ye una preba de lo muncho que nos queda por andar. Nel más benévolu de los casos, la mesma esistencia d’una llingua como l’asturianu ye un problema, un enguedeyu, dalgo fastidioso d’afrontar.
Basta ver el xestu torcíu del gobernante cuando tien d’opinar en públicu del asuntu llingüísticu o la tentación, casi siempre irresistible, del informador en tirar del filón polemista, como prebes de que la nuestra comunidá ye, como en tantos otros asuntos, una isla d’escuridá y reveníu conservadurismu.
Presta saber qu’hai regayes de lluz que s’abren y xente como esos entamadotes del congresu ‘Llingua, clase y sociedá’, amigos de preguntar qué pasa equí y por qué la nueche. Too eso de lo que nun quier nin oyer falar l’Asturies oficial.